أخبار عاجلة
الرئيسية / آفاق نفسية / الحلقة الثانية من حلقات تعديل السلوك ..(الاندفاعية)

الحلقة الثانية من حلقات تعديل السلوك ..(الاندفاعية)

 

خاص سنابل الأمل
الاستاذ / أحمد يحيى غنيمي
جمهورية / مصر

اليوم موعدنا مع الحلقة الثانية من تعديل السلوك وهنتكلم عن (الاندفاعية)..
الطفل المندفع دا ياجماعة معناه انه بيتصرف بدون صبر …. وبينتج عن دا انه بيقوم بتصرفات نتائجها غير محسوبه وبالتالي في الغالب بنكون غير راضيين عن التصرفات دي وهو كمان مبيكونش راضي عن النتائج اللي وصل ليها
وبالمناسبة مفيش علاج دوائي للاندفاعية (على حد علمي) حسب المراجع العلمية حتى الآن يبقى مفيش أمامنا غير العلاج السلوكي.
وفي هذا الصدد هستشهد بالحديث الشريف إنما العلم بالتعلم وإنما الحلم بالتحلم ومن يصبر يصبره الله .
يعني إيه ؟…يعني الصبر دا شيء ممكن إبننا يتعلمه زي أي سلوك في الدنيا وبالتالي يتغلب على الاندفاعية
طب يللا نبدأ في الخطوات على طول بس خللي بالك لازم نمشي بالتدريج وإلا هندخل في مشاكل كتير :
أولا: هتعلم إبنك يعني إيه الوقت وهنبدأ بالفرق بين بالليل وبالنهار وبعدين ندخل على الساعة وتبدأ تربط الأحداث بالساعة يعني مثلا هتقوله — هنلعب على الكمبيوتر لما العقرب دا يجي هنا ودا يعني الساعة خمسة — وتبدأ بخمس دقايق وبعدين تزود بقى بالتدريج وإوعى تستسلم لمحاولاته لاستعجالك وخليك هادي تماما مهما عمل…. ها مهما عمل.
ثانيا:  انتظار الدور:
وهنا هتديله الأول مساعدة جسمية كاملة يعني ممكن أمسكة كل لما يجي يقوم بالسلوك الاندفاعي وبعد كدا نسحبها بالتدريج يعني هنعمل موقف أو لعبة – مثلا هتقوم تاخد الكورة بعد ما محمد ياخد العربية – وبعد كدا نزود الأفراد اللي مفروض ينتظرهم بالتدريج – بعد كدا هيكون قادر على الانتظار للدور
ثالثا: كـــن نموذج: 
ودا اللي بنسميه أسلوب النمذجة ودا من أهم أساليب العلاج السلوكي لأن الطفل بينفذ اللي بيشوفه بسهولة أكتر من أنك تديهوله عن طريق تعليمات، وانت بقى هتعمل إيه؟ هتصنع موقف كامل زي اللي انت عايز ابنك يتصرف فيه بالظبط وتعمل اللي انت عايزه يعمله وتخلي بالك إنك تقول تعليمات لفظية موجههة لابنك.
أخيرا التحكم الذاتي:
ودا معناه ان الطفل هو اللي يلاحظ سلوكه وبعدين هو اللي يعدله بنفسه ودا أعلى حاجة ممكن نوصلها ومش بيحصل إلا في مستوى مرتفع من الإدراك و لازم يمر بمراحل كتير من المساعدة لحد ما يوصل للمرحلة دي.
أهم حاجه في علاج الإندفاعية اننا منبقاش مستعجلين علي النتيجة. احنا بنعلمة الصبر فلازم نكون قدوة .
و بكدا تكون خلصت الحلقة التانية من #مع_أحمد_يحيى
متنسوش تقولوا رأيكم في التعليقات وتقترحوا عليا موضوعات الحلقات الجاية وبشكركم على المتابعة و نلتقي إن شاء الله في الحلقة الثالثة.

عن التحرير

إدارة التحرير : ايميل asdmag.m@gmail.com واتساب: 00966568325825